Ñe'ê poty

Mborayhu Apyra’ÿ

I
Ha’etevaichako chéve
aguahêva yvagapýpe
nde resápe repukárõ
che mokunu’û kyrÿi.
II
Jasyra’ýicha ikarapã
mokõive nde tyvyta
ha iguýpe che renói
omimbíva nde ropea.
III
Añandu aveveha
nde rováre añembojávo
hay’umi ne kambuchígui
ambogue mba’epota.
IV
Ne rembégui aipe’a
eirete he’êmbochýva
otykýva che ñe’ãme
chemoangapyhy pavê.
V
Che aimo’ãma yvagavóra
cheraháva ijyva ári
aveve añemyatimói
ndaroviái rohayhuha.
VI
Tuichaite ko mborayhu
añandúva nde rehe
yvytu che gueraha
py’akyrÿi che aho’i.
VII
Hi’ãitémavako chéve
ko ára ndohasavéi
tajecha akói ndeykére
mborayhu apyra’ÿme.

(Rubén Zarza)